A MI CHAWM NAWH
Hring khawvelah mim ang ei pieng, hremhmun hmasuon zingin,
Sienkhawm Pa hmangaina leiin vânrammawi ei chang tah,
Sandamnaa inthlung siin,
Hringmi lêngtin ei kâr lam ang a hla.
“A mi chawm nawh” ti trawngbauvin,
Hraileng piengthar tamtak an zâm zo vie,
Trawngbau nêkin ei nundanah,
Lalpa tarlang ei tiu.
Thlarauva piengthar i ni chun i hmêlah inlang sien,
Insângna le inthûknaah mi dang i deusaw chun,
Hrietnaw kârin Setan lawmin,
Nau ang a lo innui thei zing a nih.
Pulpit tlângah Chanchinthra thu hrila i ngir chângin,
Mani chanchin inpuongna-in i hun hmang rawi i tih,
Thil tinrêngin hunbi a nei,
A hun le hmun hrietthiem tum hlak ei tiu.
Kristaa pieng ei ni si chun Kristaah zo ei tiu,
Ei fâk ei dawnah inlang sien, ei nunah vul bawk sien,
Ei fe, ei hungna kawngtinah,
A ngilneina, thratna târlang ei tiu.