Thal tui ang kan nghah hun lawmawm
Phuahtu: K. Zalawma
Doh is G
Thâl tui ang kan nghah hun lâwmawm,
Sik ni eng mawi Krismas hlimawm,
Leng zawng thinlai tihlim turin,
A lo her chhuak, Krismas hlimawm.
Krismas chibai, leng zawngte u,
Thinlung ngui leh huatna zawng dah thain,
Rem Lal lo piang i lâwm ang u,
Krismas chibai inhlân tawnin.
2.Hmâna pi pute hmuh phâk loh,
Krismas hlimawm kan thleng leh ta;
Mawina tinrenga inthuamin,
Rem Lal lo piang lâwmin kan awi.
3.Vân ropuina zawng zawng hlîpa,
Lei Bethlehem ran in tlâwma,
Lei mihring tâna piang Krista,
Lâwmna rimtui nen kan fak che.
4.Lei mawina thuam tinreng pawh hi,
I zâra kan chan a lo ni;
Kan tân i retheih azârah,
Krismas lâwmin hlimin kan zai.
5.Chung Pathian zâra rual duhte,
Krismas lâwmin i zai ang u;
Kan nun khua tur kan hre phâk lo,
Kan tân hun hlu – Krismas hlimawm.
