Tiena jakob sîngkhuol mi a'n chang khan
Phuahtu: Emmanuel Lalruotfel
A RAM DAN AN DANG LEIIN
1. Tiena Jakob sîngkhuol mi a'n chang khan,
Hmangai Rakil țâng bêla inngaiin;
Ditlo le a țâng a lo bêl,
Hnâwla nuor el thei di'n a'n chang si naw;
A ram dân a'n dang leiin.
CHORUS :
Nuom le nuom naw hril thei ding ka'n ta nawh,
A ram dân a'n dang leiin;
Dûthusâm rama ka lo buoi hlak hi,
A ram dân ka hrietthiem ngai naw lei a nih.
2. Nuthai chang dinga dûthusâm Rakil,
Jakob ângsûngah a hung inlâwi tah;
A lung lâwmna kim a ti'm aw?
Sienkhawm a thâi duot lai sam ang țhê in,
Rûn sûng țapna'n hung inchang.
3. Leh-a a'nthawk Juda a hung pieng ie,
Malsâwmna suon sâwng a lo ni ngei maw!
David bulpui ngei a lo nih;
A hmêla chun lâwm kim zo naw sienkhawm,
Tu'm lâwm naw um ta'ng an ta?
4. Dit lem ka thlang thei chuong naw ie Lalpa,
Ka thlang lo malsâwmna'n a'n chang hlak si;
Ieng hi'm a țha Lalpa nangin,
Ka chunga thil tlung ding chu thlang lem raw;
Iengkim I ropuina di'n.
