Kan zo tlang ram nuam hi chhawrpial run I iang e,

Hal lo te’n lungruala dar ang kan lenna;

Perhkhuang tingtang, zaia kan chawi lai, I mawi e,

Parmawi tinreng leh thlifim lenna kan Zoram nuam.

      I mawi em e, kan Zoram hmun sang,

      Fiar-a tui thiang kan dawnna;

      Tlang tina thing tin zar, mawi leh romei a zam karah,

      Tlang tin zaleng zawngte lungrual kan insuihkhawm,

      Aw, I mawi chuang mange, kan lenna Zo tlang ram nuam.

Hmanah pi pu, lasi, khuavang leng tin kaiin,

Doral hlau reng renga ram tuan nilenna;

Thinlai lungmawl vanga tlang tin rau tin zawlin,

Tunah erawh thimnate’n zamual an liam zo ta.

Zaiin chawi vel ila, perhkhuang tingtang remin,

Hei ang ram nuam reng hi ram dang awm ve maw;

Auvin hril vel ila khuavel hnam tin zawtin,

Hei ai ram nuam zawk hi awm chuangin ka ring nem maw!

Kan ram mawi, chul lo la, parin vul lehzual la,

Thangthar hmatiang sawnna tur khua sei leh se;

Tin, lo varin, lo thangin, lo sang zel ila,

Chung Pathian malsawmna pawh kumkhuain awm zel rawh se.