Hmana kan nun hlui a chul tawh hnu,
Ka dawnin awmkhua a har ngei e;
Chhungkim dar ang lenlai nite zawng kha.
Mual an liam hmanlai an chang zo ta,
Lung min len tinkim ka dawn khawlin.

Kawl a ngui tlai ni a her liam a,
Rial ang lo dai e i run kaina;
Zan tlai bawhar mah hi siang a lawi ṭhin.
Han hawi ve ang che i run kaina,
I sulhnu rial ang a dai hnu hi.

I hlimthla te mai hi kan chan tawk,
I anka biak leh mi chhang si lo;
Ka thlir ang che awm khawhar min hnem ah,
Ka ngai che bawihte, ka ngai em che.
Min hnem an awm love nang lo chu.

Hmanah chuan runhmun a leng kan ni,
Tunah erawh kar mi lo dan ta;
Chatuan tlang lianin mi dang ta si a,
Ka lenna hringmi khawvelah hian.
Ka nghak lungduh hnen ka thlen hun tur.

Kei mi ngai lovin i liam ta maw?
Chung Pathian run nuam chu pan zel rawh;
Tah chuan hmangaih lal i han hmu ang a,
A lo chhang ang che hmangaihna in.
Angel lenna chung Pathian runah.

Chung Pathian run nuam chu thleng ila,
Lungduh ka ṭhen takte kiangah khian;
Luaithli nul inṭhen te kan hlau tawh lo'ng,
Mittui tlak Lalpa'n a phal tawh lo.
Hmangaih Lal rorelna hmun a ni.