Thlarau thianghlim meialh leh chhumdinga hruaitu
Phuahtu: Zasiama
Doh is B♭
Thlarau thianghlim, meialh leh chhumdinga hruaitu,
Lal Immanuel, lo hnai leh rawh;
Thlaler kawng thim taka ka vah lai hian,
Lo eng leh la, pialral Varparharsi eng mawi tak chu.
Aw, van arsi, aw van arsi eng mawi,
Ka chhandamtu leh ka Lal duhawm ber i ni;
Lungngaihna fawn velin ral lo lian mah sela,
Himna Lalpa, ka bel ang kumkhuain.
Lunghlu kawngkhar mawi leh ropui an hawn hun chuan,
Rangkachak tuallaiah ka leng ang;
Sual vanga ka lungngaihna zawng zawng hi,
Ram ropui leh hmun hlunah chuan aw, an la par vul ang.
Beramno lalna, ram ni tla ngai lovah chuan,
Kan then takten khawvel ngai lovin,
Zaiin Beramno ropui an fak a,
Nunna thing daihlim hnuaiah chuan puan var sinin an leng.
