Damsung tawite hmang dingin saruokin ei pienga
Phuahtu: C. Lalthlunglien
ṬHB 149.
IN RING RAWH
Damsûng tawite hmang dingin saruokin ei pienga,
Sienkhawm duthu aisâmin hnawt phâk lo zawngin;
Saruoka kîr nawk el di’n in ring ngai naw la khawm,
Tawp chin nei, i hnuoi hringnun.
In ring rawh, in ring rawh,
Nitin thina’n a hnai che,
Hriet naw kâr thlafam la chang i ta,
Lal tadinga i hun ṭha;
Hmang lova i liem ding chu,
A pawi ngei, a pawi awm ngei.
Hun lawmum a liem hma hin dâksuok la en vêl ta’m,
Hrietna dinga na nei le mit nei tahai chun;
Hnuoi ro thil bo nawk el ding zawngin i hun tamlem,
Hmang ta naw, ka nau ditum.
Chung tieng en la ngaituo rawh ni le thla arsihai,
Pawi tawk lovin an lêngza siemtu lung a awi:
Nang khawm kîr la khawvêl thil thiemna hausakna chau,
Zawng ta naw, ka nau ditum.
Lal tadinga hun hmang chu insîr rêng an um nawh,
Lungngai zân thim hnuoia khawm khawlevar a tih;
Sakruong hmulo hmêlhemin thlafam lo chang la khawm,
A famkim la chang i tih.
