THINA JORDAN
Lungngâina ka’n tlângpui,
Buoina tam tak ka tuorpui ha’n;
Thina Jordan an mi kâisan tah ie,
A mal mala fe’n,
An hnungah lungngâi le rinumin ka la’n vâi.
Damlai thlalêr hi iengtin am fang ka ta?
Vân Lily pâr khawpui mawia tlanhai,
Ruol kima lêng khin;
Ka hmabâk thlalêr hi rinumin an suklang zuol.
Thlalêr ka khêl hma chun,
Buoina tam tak tuok ding ka nih;
Lungngâina thar la tlung ding le tuita,
A tlung ta sa khawm,
Vân lawmna chun ṭhâl tui angin a suknêm thei.
Thlalêr ka fang laiin,
Hnung tieng-hma tieng ka en vêl a;
Mipui inrûm vêl an tam ie, lungngâi,
Thlaphâng khêk rawl leh,
Vân lawmna hmu lovin tam tak an liem zo tah.
Khawvêl, i chung a pik,
Thimin a thla a zârkhum che;
Hremhmun meikhu rim i’n nam zo tah ie,
I rawng bawl ding chun,
Ropuina hlimin ka thla hi zâwr ta naw rawh.
Ram hlun sin thaw dingin an mi zâwr lem tah,
Vân Lily par khawpui mawia lêng ding
In i sûnga hin;
Mithi lai vân hringna thu hi hril lem ta’ng ka tih.