RUOI LUNGSIETUM
A mi’n ruoi ropui an ṭhe a, keia Lalpa chun,
Jerusalem khârdan chunghnunga sawn,
A taksa le thisenin ruoi lungsietum chu a ṭhe;
Uoiin noah a zuk bunin hi thu hi a hril a,
“In mi hrietzingna di’n hi hi dawn ro” a ta,
A chunga thil hung tlungpêk ding chu hre zingin.
Aw, a va’n rieng ngei de maw, ka Lalpa ruoiṭhe chu!
Lungngâi sûm zing hnuoiah,
Lungngâi mitthli puma ka Lalpa ruoiṭhe chu,
Kîltu lai sawn dorâl an ṭhang ve maw?
A va lainatthlak ngêi de maw!
“Ka bei fatu’n a ke artui ka chungah,
An lek tah” ti ziek kha a hung tlung pêk ta maw!
Ruoiṭhe zovin an fe suok a, Olive tlâng tieng,
An hmaah lungngâi sûmpui chu a zîng,
A rawihai ngei khawm ṭapin lungngâi sûm tieng chu an pan;
Lungngâina no a dawn ding chu la tlung naw hrâm dingin,
A pa Pathien kuomah Sandamtu’n a ngên a.
Nisienkhawm dawn dingin khûo’n a hung rêl ta maw!
Aw ṭhangpui an um naw maw, Vân Lal lungngai tuor saw?
Zânkhuo’n a ṭawngtai a,
A thlan thisen angin a hung far zawi zawi a,
Hieng ang êm hin mi an lungngâi hlak am?
A va lainathlâk ngêi de maw!
A en a va’n tak ngêi de maw, hung en tu,
Mi lungngâi an man tah, mi suol pungkhawmhai sawn.
Hei en tu’m Zion khawpui saw, mi an hung pungkhawm,
‘Hosanna’ hung ti nawk ding am an nih?
Lawmna tûmkau hlak saw maw, an lo chawi ta si nawh a;
Hosanna rawl a danglam tah! “Hemde rawh” tinain,
Suk-elna puon sen leh, hlinglukhum chu khumin,
Kalvari tlâng panin mipuiin an sawm a.
Aw, phungruol an tîn zo maw, lâira a’n rieng ni hin,
Mipui sen vung lai sawn,
An hemdêna dingin kraws an inputtir a;
Hieng ang êm hin mi an inrim hlak am?
A va lainatthlâk ngei de maw!
A en a va’n tak ngêi de maw, thinglêrah!
Thla an infamtir a, dangchâr tuor ngawi ngawiin.
Ka Lalpa tuorna natzie saw ka hril zo thei nawh,
A thi dân lungnatumzie saw en tu;
A kut, a ke, a nâkah hliem tuorin a lo thi a;
Nuom leh simlei inhnîng raw seh, ka Lalpa thi ni chun,
A chunga tûrni khawm khi lo inthim raw seh,
A siemtu Vân Lal nau thla a fam ni hin chu.
Aw, a ruong an fepui tah, thlân khawsawt nghâk dingin;
Khârlung ngûi ruoi sûngah;
Laia suonglungpui saw vûi dârin inring sien,
Vân mihai khawmin hung râl raw hai seh;
Lawm a va um ta ngêi de maw!
Vântirko vâr zuongṭumhai khan,
“Chatuon Lal di’n a tho nawk” an tih, Haleluiah, Amen!