KAN NGAI CHE
Thlarau thienghlim Thuva nunnem,
Hung leng nawk la kan ngai che;
Hung sukhar nawk la aw, mipui chauhai,
Muol liem lovin hung kir nawk rawh.
Aw kan ngai em che, Thlarau nunnem,
Nanga bovin mipui lam an inhmang;
Thuoi kir nawk la aw Zing Arasi,
Zion lawmna lam thienghlimah.
Ngai ta! Lalpa in tlansaha’n,
An chatuon lam an inhmang;
Hnuoi berampuhai hin an thuoi thei nawh,
Iengtin am ning a ta, Lalpa?
Thlarau thienghlim, nang i um chun,
Khawvel lungngai an nem hlak;
Suol thlipui le buoina ral lien sienkhawm,
I hming inpak hla sak ka tih.
Isu nunnem, inrum nawk rawh,
Lungngai taka i tuorna;
Inhriettir nawk la, i hling lukhum leh,
I thlaphangna mak tak le chun.