LAWMNA TLANG

Artist - K.Zonunmawii

Lalpa hian min va hre chiang teh lul em ! Ka nun chhungril zawng² leh ka samzai pakhat pawh hmaih lova min hretu a ni a. Ka hun kal tawh zawng² a min hruai tawhna leh A fa ka nih avanga min zilh hau na te ka ngaihtuah hian Lalpa chuan kei misual leh mi hnuaihnung pawh hi min lo hre renga ka awm dan zawng² min hmu reng si. Khawvel mi ropui leh thilti thei ka hriat em² te hian tuman min hre lova ka hmingin min ko ngai lova, ka harsatna hrilh turin ka duh leh mamawh hunah ka be thei lo. Mahse Lei leh Vana Lalber hian min hre tlat...min hre chiang a ni...ka tan chuan a va HLU tak em! Min hria mai nilovin Fa nihna min pe a, ka duh hun² ah ka la be thei zui mawle ! Lalpa chu fakin awm rawh se. Chuvang chuan, 'Chauh chang awm thin mahse Lalpa ka zui ang che' tih mai loh chuan kei hi chau thin, a khawngaihna vang chauhva nung dama awm ka nih avangin A hnung zui lo thei lo ka ni bawk si a. 

Lalpan ka tana kawng a ruat leh ka dinhmun min pek hi ka duh khawp lova vuina hlirin ka khat thin. A remruat danah hian ka van lungawilo nasa thin tak em ! Ka duh ang ka neih theih nante, mi ngaiha ka lan mawi ve theihnante ka duh leh mamawh tinreng Lalpa chu ka dil thin. Fa chuan a pa hnenah thil a dil thin ang hian...Mahse Lalpa hian min hriat chian em avangin ka duh zawng² nei ila ka thatpui dawn lo tih a hriat avangin ka mamawh chauh min pe thin alo ni a ! Lalpa min hriat rengna hi ka tan a va hlu teh lul em ! Heng zawng² ka hmuh fiah theihna tura ka ngaihtuahna leh ka mit min tih var sak chinah chuan Lungawina tlang thawvenga chengte nun chu Lalpa zarah ka lo tem ve ta....Lalpa chu fakin awm rawh se.

Mi zawng² hian mahni tawkah harsatna, lungngaihna kan nei theuhva. Chutah chuan ka tawrh hi nasa chuang bika ngaihna ka nei fo thin. Damchhung khawsak lungkhamna...engtin nge ka khawsak anga enge ka ei anga enge ka in ang, ka hmalam hun atan engtin nge ka inbuatsaih anga engtin nge nuamsa takin ka nun ve ang tihte ka ngaihtuaha. Ka tan kawng a va bo thin tak.  Ka theihna a va tlem teh lul em engmah ka ni silo tiin ka lungngaia zan reiahte ka tap ru fo thin...Mahse Lalpa chuan amaha innghat lo thei lo, a chakna chauh rinchhan tur ka nih zia min hriattir a duh vang a lo ni a...ka lungngaihna avanga Lalpa ka koh chiah chuan Lalpa ?hatzia ka hmu a. "Lungngaia ka awmin Lalpan min ngaihtuah thin" Lalpa chu fakin awm rawh se. Ka theihna nilovin A chakna zawkin chu tahna ruam atang chuan "Lawmna tlangah" chuan Lalpan min lawntir si a. Lalpa chu fakin awm rawh se.

Lalpa hi ka Pathian bik hliah², tawmkai lo min thlangtu, ka tlin lohna haidera min thlangtu, chaklo leh bawrhsawm lai ber pawha min thlahthlam ve ngailotu leh vawi tamtak ka phatsan chung pawha khawngaihna kuta min chelh rengtu hi KA LAL LEH KA PATHIAN ni awm reng a lo ni(Pathian dang hi awm tak² pawh nise min ngaidam zozai tawh tawp lovang le)Min hmangaihzia hi tunge hrilhfiah thei ang le...Minung ngaihtuahna nei tuman an hrilhfiah thei lovang, tuman an thei lo, mihring finna hian a chhui phak mawlh lo...A VA ROPUI EM ! Chuvangin ka Pathian hi a lungawina khawpa faka chawimawi theih hi ka va duh teh lul em ! Ka Lalpa lungawina khawpa fak leh chawimawi hi ka duhthusam ber a ni. 

-PC Lalneihtluanga