Ka hril seng lo min silfaina chu

Misual dum ber min silfaina chu," tih hla hi Kristian Hla Bu-a chuang ni lo vah chuan Hla lar, sak hlawh tak a ni a, Mizo fate zingah chuan hre lo kan awm âwm lo hial awm e. A hla thu hi a tluangtlam a, hrilhfiah hran ngai lovin a insawifiah nghal a, sak a nuam hle a ni. 

      Hla phuahtu   He hla phuahtu hi Well Born Manners Lalremruata Azyu a ni a (Azyu = Azeu). A pa hming chu A. Khawcho a niin a nu chu P.C. Lalchhingpuii a ni. 

      Pian leh murna   October ni 2,  1973-ah Mizoram chhim, Siaha khuaah a piang a.An unau hi pali,  mipa pahnih leh hmeichhia pahnih an ni a, an unau zinga a naupang ber dawttu a ni. A hming sak chhan chu a pa hian Shillong-ah lehkha a zir laiin an sikula Asst. Headmaster Well Born Manners-a chu a Guardian atan a hmang a, a ngaihsan em avangin a fapa hmingah a puttir ta a ni. A hnuah a nu chuan sâp hming ngawt chu tha a tih loh avangin Lalremruata tih hi a sa tel a, tichuan  a hming pum chu Well Born Manners Lalremruata Azyu tih a lo ni ta a ni. 

       Piantharna a chang   Tleirawl thenkhat khawvel thila han inhman   nuam tia ngai a, han tihchhin duh an awm thin a, ani pawh hi chung pawl zingah chuan a tel ve hman a. Chhungkuaa nu leh pa, u leh naute tawngtainate chu Pathianin a takin a chhang thin a ni tih hre chiangtu zingah a tel ve awm e. thahnemngai taka an tawngtaina chu Pathianin a chhang a, kum 1991 khan Pathian Thlarau Thianghlim pawlna changin piantharna a chang ta a, Pathian hmangaihna hi au chhuahpui lo thei lovin a nun chu a lo inthlak ta a ni.

       Nupui neih leh Kohhrana inhmanna   Kum 1992-ah B. Vanlalsiami nen an innei a, Pathian malsawmna fanauah pawh changin fapa pahnih leh fanu pahnih an nei a, Siahaah hian an khawsa a ni. Evangelical Church of Maraland-ah thalai  (KTP)-ah pawh a theih ang tawkin a inhmang thin a, zaipawl hruaitu chanvo te changin  Kohhrana rimawi lam tui mite pawh Solfa Camp-te a neihpui thin. Siaha-ah hian  Fine Tune Recording Studio a hawng a, Kohhran leh mipuiten an chhawr tangkai hle. Kum 2012 atang khan ECM Kohhranah Music Instructor hna a chelh a ni. 

       Hla lo pianna tobul chu   Kum 1992 atangin hla a phuah tan a, tun thleng hian hla sawmli chuang lai a phuah tawh a ni. Evan. Lalhmingliana, El-Bethel Speaker-in  Siaha-ah camping a nei a, a team member-te chuan Tape Recorder-in Hriatpuii tawngtaina "Lei leh vana thuneihna zawng zawng neitu ni si, Pilata hmaa thiamthu sawi thei lo; tui zawng zawng neitu ni si, tuihala au kha, tudang vang a ni lo, keimah vang a ni," tih chu an play thin a, chu chu a rilruah a cham reng thin. March 2000 khan inah amah chauhvin a awm a. A rilrua thi thei ngai lo El-Bethel laia tawngtaina thu chu a rilruah a lo  thar leh uar uarin he hla ropui tak, "Aw hmangaihna a va thuk em!"  tih hla hi a lo piang ta a ni. "tawngtainain thil nasa tak a tithei"  tih chu he hla lo chhuah dan atang pawh hian a hriat mai awm e.  

       Hla ropui a phuah dan   Tichuan , tingtang, ziakloh bu leh pen a la a, "Lalpa  he tawngtaina thu hmang hian hla min pe rawh," tiin a tawngtai a, darkar khat chhungin he hla ropui tak hi a lo piang ta a ni. A chang tawp ber a ziahlai phei hi chuan hla phuah theia a awm ringawt pawh chu mak a ti hle a. Ama tlin lohzia te a hmu let a. "Amaherawhchu, eng dang vang mah a ni lo, hmangaihna avang chauh a ni, mi tling lote min thlang chhuakin tawmkailo berte pawh min hmang thin a" a ti lo thei lo a ni. He hla hian Zoram chhung mai ni lovin Mizo awm tawhna hmun hrang hrangah thalai nun kal sual laklawhten inchhira Pathian lam an hnaih nan Pathianin mal a sawm a, chuvang chuan "Hla ropui tak a ni," tiin sawi ila a hriatthiam theih mai awm e. A harmonise-tu hi Zothanzuala Chhangte a ni. 

He hla hi Bethsy Lalrinsangi leh Blessed Choir ten mawi leh thiam takin an sa lar a ni. 

        

Source : Hla Lar 110

Hla phuahtute leh hla tobul 

By V.L. Luaha Renthlei.