LALPA KAN SURRENDER
1. Jentêl nghâknu saruoka ka um laiin,
Ka chunga LALPA'N hmangaina puon a zâr;
Ka sîr tluonglam Kalvari tlânga hung kâiin,
Bienga hmangai thlan dâr tui ang luongin;
A mi lo tiem kumtluong hmangai biethu,
Thâi lungmâwl ka lo chang hmangaina lei chauvin.
CHORUS:
LALPA, kân surrender i thâi lungmâwl hi,
Keimaah mawina le țhatna rêng ka nei nawh;
Lungmantam nêkin a hlu I thâi ka lo chang hi,
Duthusâm khêla hmangaina a ni maw!
Ngên dang ka nei naw LALPA I hmaah.
2. Leilung dâna kân siengna lungnatum tak,
Zuopa Amor le Chunnu Hit mi an nih;
Fahra ang hmangaina dawnglo sênnau ang ka nih,
Laihrui âttu ding chen laina neilo;
Sâwpfaina tuia insil ni bawk lo,
Damna ka lo chang LALPA hmangaina zârin.
3. Zâi tin remin âwi ka tih LAL hmangaina,
Phûlo Lalțhungpha le Lal puon mi petu;
LALPA samsui hringmi ditdâna țhe theilo,
Biethu a mi'n hlân Salem khawpuiah;
Ka mamaw tinrêng pêk A mi tiema,
Famkimna puon silin A mi pawm țâng laiah.
4. Hmangaina leia thâihne lo chang ta maw!
Chun le zuo hnungsawnin mi zui ei sûlhnung,
Ûmlai chau naw chu mi țhetu ding an um nawh;
Saruokna, rinumna le kâwlhnâm chen,
Thâi țhetu dingin LALPA'N A phal nawh;
Kumtluong Di rûnah LALPA hausakna ka chên.