1. Lalpa, khawvêl a hin damsan dang ka nei nawh,
Ka piengsan ka hringsan nang chau I nih;
I hniekhnung zui pei hi ka duaisâm a nih,
Fe pei ka tih inthim sienkhawm.
CHORUS:
Thlihrâng nghâktu hai le,
Sûmzînghai pawisatu hai chun;
Thlâichî hai thlâkin sîk bawk naw nih,
Zîngkar chun i thlâichî chu thlâk la;
Zân huna khawm i kut la kîr naw.
2. Lungngaina zân thim le,
Buoina sûmzîng hnuoiah;
Ka hringnun beidawngin inrûm sienkhawm,
Ka himna kulpui le ka thlamuongna I nih;
Kîr rêl lovin fe pei ka tih.
3. Ka hmaa mi Thienghlim hai sûlhnung zui peiin,
An thlarauin thlîrin an mi biek zing;
An ru ṭâwl hai chu rût khâwmin sawm pei ka tih,
Lalpa kuom ka tlung hmakhat chu.
4. Harsatna thlipui le buoina tuifâwn haiin,
Ka hringnun hi chîmin nuoi vêl sienkhawm;
Ka ta dinga I hlutzie suklangtu an nih,
Rinum sienkhawm lawm pei ka tih.