Lungrualtein hmangaih lungduhte nen,
An sawi pialral chawlhna ram nuam ngai lo iangin;
Hlimten hmangaih par kan tlan a,
Mahse, thenna tur ni a chhuak leh thin.
Ka tuar thiam lo, aw, ka zuam lo,
Hmangaih thianghlim par ka tlanpui lungduhte hi;
Ka then thei dawn em ni, aw ka zuam lo,
Lalpa min hnem ang che.

Kan chenna khawvel reng a zau mang e,
Lungduh lenrualte then nan a zau lua ka ti;
Tawn leh ni her chhuak leh ang maw?
Ka dawn phak lo, Lalpa min veng tawn rawh.
Kan lenna tlangte dang mah se,
Rinna hmun khata then lohna khawpui thlirin;
Rinawm taka awm a, ding nghet turin,
Lalpa min veng tawn rawh.

Khua tin, tlang hran belin leng mah ila,
Hei hi hrereng fo ang aw - Rinawmna hi;
Hei hian a ni, min hruaikhawm dawn,
Chatuan then tawh lohna ram mawiah khian.
Dam takin aw, mangtha, mangtha,
Tawngtaiin Lal hmaah i leng hmun thin ang aw;
Hmangaih ram mawia intawk leh turin,
Dam takin aw, mangtha.