Phuahtu : Laltanpuia

Mahten awmhar zunleng tui ang ka dawn seng lo,

Sialkhaw khanthuam hmuntlangah chuan ila;

Tah zai vawra lunglai herin,

Tlangbawm romei chhum ang zam ral chu keimah hi.

Aw, rihtlangpui liam mah ila,

Pialleia Parte nang i len chhung hian;

Hawilopar min lo ban mahse,

I lam ka thlir bang thei mai dawn em ni?

Chhun ni a rei, zankhua hrui ang a tawi chuang lo,

Ka tuar tawkin khuanun a rel si lo,

Zantiang laikhum thlehnem hnuaiah

I zunleng zam hianin Bawihte, min tho leh thin.

Chhawrthlapui chung si-ar mah za te'n an leng hmun

Awmhar tahzai ka re, dawn a sei zel

Nang nen run hmuna leng turin

Ka luah che Parte, tlangzapui hian min ring lo.

I chun leh zua karah par ang vul rih mah la

Hmanhmawh la Parte, khua i tlai ang e,

Tlangnuam siahthing  par lai hnuaiah

Tham ralah mai em ni Bawihte, thudi kan sawi.