Luaithli nula inthenna a awm lawng nakinah
MKHTB(1936) 178
Luaithli nula inṭhenna a awm lawng, Nakinah,
Chung Pathian run nuam kan thlen hun chuanin, Nakinah;
Chung van rial rumna piahah hlim taka kan len hun chuan,
Chung Pathian vang-khuaah chuan, Isua nen, Nakinah.
Beram No thianghlim chu ka han hmu ang, Nakinah,
Ka lenrual duh ka ṭhen takte nen chuan, Nakinah;
Amah kan fak za tawh ang, chutah mittui a hul ang,
Lungngai, lusun hmel kan hmu tawh lovang, Nakinah.
Lungduh inṭhenna te hi kan hre lawng, Nakinah,
Aw, lungngaihna hmun lei hi, a awm leh ngai tawh lawng;
Lili par mawina hmuna, chatuana kan len hun chuan,
Mittui tlak, hrehawmnate a awm tawh lawng, Nakinah.
Mittui senga kan ṭhen tak - ka lenrual lungduhte,
Thihna lui ral-tiang ram mawi leh nuam takah chuanin;
Kum tluanga inṭhen leh lo turin kan cheng reng tawh ang,
Van rama tual leng za-in, kan chawl kumkhua tawh ang.
Aw, ka lungduh ṭhenten zamual an liam dawn hianin,
Ka thlir zel dawn ka lungduhte zamualpui danah;
Krista-in veng zel rawh se, kan inhmuh leh hma loh chuan,
Dam takin aw, chung Pathian malsawmin kal ang che.
He lei hi zawng lungngaia ṭahna hmun a ni si,
Bilhpuan khuma luaithli nulna hmun chauh a ni si;
Thlarau khawvelah khian zawng, nuam, hlim tawpin kan leng ang,
Varparh Arsi, Chhandamtu lalna ram a ni si.
