Hlau suh ulangin ngai rawh u mi tin ta tur
MKHTB(1936) 141
Hlau suh ulangin ngai rawh u, mi tin ta tur,
Chanchin Ṭha lawm tlak em em ka rawn thlen che u;
Vawiinah hian Davida khuaah Tidamtu a piang,
Lal Krista kha, in chhinchhiah theih nan,
Ran thlengah in hmu ang.
Ka Lal zan chamna hmun, aw ka va ngai zual thin em,
Berampu ruala kal ka nuam Bethlehem tlang chungah;
Nausen puana tuam chu aw, zawtin hril thei sela,
A siam Zion khawpui tual nuam chu,
A ngai ma lo vang e.
Hmanah kan lawmna par rimtui a chuai zo ta,
Mahse ka Lalpa'n Zion par mawi min lo thliah;
Thlaler ram pawh hi zai ve se, 'Hosana' tiin,
Khawvel ram zawng chungah hian lawmna,
Remna leng vel rawh se.
Tlanga hlim r'u, pangpar vulte, van Hosana,
Zawlnei hrilh angin Zion kawngkhar a rawn hawng;
Van khawpui tan lungngaih buai leh mittui tlakna,
Mahse kan tan phaizawl tuktinpar-
Mawi a vul chhuak leh ta.
Eden chhuah tlang a mawi leh ta, ral an ṭin zo,
Lawmna rimtui leh van hla mawi chu a leng vel;
Hlima lawmin i fak ang u, Lal riangvai hi,
Min hmangaih luat avangin kan tan,
Khua nuam a lo chan ta.
