Krista pieng ni champha damte'n ei tlung nawk tah
Satu(te): Jeneth L. Varte
AW CHRISTMAS
1. Krista pieng ni champha damte'n ei tlung nawk tah,
Sikni êngmawi daifîm, boruok thieng rimtui leh;
Hringmi rimawi thâwmri a'n thang ei vângkhuo a,
Christmas ni lâwmum tak chu ei lo tlung tah.
CHORUS:
Aw Christmas, ka damsûngin innghil nâwng ka che;
Khawvêl thim elvartu Lal hung pieng ni chu,
Hringmi suola bohmanghai zawng ding a;
Khawvêl Sandamtu hung pieng ni chu.
2. Pâr mawi chi tinrênghai mawite'n an pârvul ie,
Thing lênbuong zârmawia sîr vâha'n zai an rem;
Thlîr vêl inla lênkâwl a mawi vân dumpâwl leh,
Ei Sandamtu kutsuok a va ropui ngei!
3. Hieng ang rênga hun lâwmum dang a um nawh ie,
Chunnu zuopa hrailêng ruolha'n zaikhat vâwr a;
Zîng sûn zân khawvâra inpâkna hla remin,
Christmas ruoipui ei țhe LALPA ropuina'n.
4. Hieng ang hmangaitu Lal dang rêng an um nawh ie,
A hringna inhlânin ei ta di'n A mi pêk;
Ei nei rothilhai leh ei nun pe vêng ei ta,
Ei ta dinga Nau pieng chu chawimawi ei tiu.
